ಸರಕಾರಿ ಕಚೇರಿಯಲ್ಲಿ ‘ಮಾಯಾಲೋಕ’ದ ಆಟ ದಂಗೆ ಎದ್ದ ಪಿಡಿಓಗಳು!
ರಣಬೇಟೆ ತನಿಖಾ ದಳ ಕೊಪ್ಪಳ ನಂ :28
ಕೊಪ್ಪಳ: ಮಹಾಭಾರತದಲ್ಲಿ ಕೃಷ್ಣ ಇದ್ದಂತೆ, ರಾಮಾಯಣದಲ್ಲಿ ರಾವಣ ಇದ್ದಂತೆ, ನಮ್ಮ ಸರಕಾರಿ ವ್ಯವಸ್ಥೆಯಲ್ಲಿ ಕೆಲ ‘ದೊಡ್ಡ ಬಾಬು’ಗಳಿರುತ್ತಾರೆ. ಇವರ ಕೈಯಲ್ಲಿ ಅಧಿಕಾರವೆಂಬ ಮದ್ದು! ಇವರ ಬಾಯಲ್ಲಿ ನಾಲಿಗೆ ಇರುವುದಿಲ್ಲ, ಬರೀ ‘ನಾಗರ ಹಾವಿನ ವಿಷ’ ಮಾತ್ರ! ಈ ಕಥೆ ಕೊಪ್ಪಳ ಜಿಲ್ಲಾ ಪಂಚಾಯತಿಯ ‘ಉಪ’ ಹುದ್ದೆಯಲ್ಲಿ ಕುಳಿತಿರುವ ಒಬ್ಬ ಮಹಾಶಯನ ಕರಾಳ ಕಥೆ.
ಕಳಿಸಿದ ವಸೂಲಿ ಫೋನ್! ಯಾರವನು ಆ ‘ಬ್ಲ್ಯಾಕ್ಮೇಲ್ ಬಂಟ್ವಾಳ’?
ಲೋಕಾಯುಕ್ತರ ಗಂಟಲು ಹಿಡಿದು ಹಣ ವಸೂಲಿಗೆ ಇಳಿದ ಈ ‘ಉಪ’ ಅಧಿಕಾರಿಯ ಗೇಮ್ ಪ್ಲಾನ್ ಕೇಳಿದರೆ, ನಿಮಗೆ ರಕ್ತ ಕುದಿಯುತ್ತದೆ! ಅಕ್ಟೋಬರ್ ಅಂತ್ಯದ ಸಮಯದಲ್ಲಿ, ಗ್ರಾಮ ಪಂಚಾಯತಿಗಳ ಫೈಲ್ಗಳಲ್ಲಿ ‘ಬ್ರಹ್ಮಾಂಡ ಭ್ರಷ್ಟಾಚಾರದ ಜೇಡರಬಲೆ’ ನೇತಾಡುತ್ತಿರುತ್ತದೆ. ಮಾನ್ಯ ಉಪಲೋಕಾಯುಕ್ತ ಬಿ. ವೀರಪ್ಪನವರ ಕಲಾಪ ನಡೆದು ಮುಗಿದಿದ್ದರೂ, ಅದರ ಬಿಸಿ ಇನ್ನೂ ಇಳಿದಿಲ್ಲ. ಬಿಸಿ ಇಳಿಯುವ ಬದಲು, ಈಗ ‘ಹಣ ವಸೂಲಿಯ ಕರೆ’ಗಳ ಮೂಲಕ ಅದು ಇನ್ನಷ್ಟು ಉಗ್ರರೂಪ ಪಡೆದಿದೆ. ಈ ಇಡೀ ಪ್ರಸಂಗ ಅಧಿಕಾರಿ ವಲಯದ ಆತ್ಮವಿಮರ್ಶೆಗೆ ಮತ್ತು ಸಾರ್ವಜನಿಕರ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ಆಗ ಎಂಟ್ರಿ ಕೊಟ್ಟಿದ್ದು ಈ ‘ದೊಡ್ಡ ಬಾಬು
”ಕೇಸಿಂದ ನಿಮ್ಮನ್ನು ಸೇಫ್ ಮಾಡಿದ್ದೇವೆ. ಲೋಕಾಯುಕ್ತರು ನಿಮ್ಮ ಗ್ರಾಮದತ್ತ ಸುಳಿಯದಂತೆ ವ್ಯವಸ್ಥೆ ಮಾಡಿದ್ದೇವೆ,” ಎಂದು ಪಿಡಿಓಗಳಿಗೆ ಅಭಯ ನೀಡಲಾಯಿತು. ಆದರೆ, ಪ್ರತಿಯೊಂದು ಸೇವೆಗೂ ಒಂದು ‘ಚಿಲುಮೆ’ ಇರುತ್ತದೆ! ಈ ‘ದೊಡ್ಡ ಬಾಬು’ ಕೇಳಿದ್ದು ಎಷ್ಟೆಂದರೆ, ಪ್ರತಿ ಪಿಡಿಓನಿಂದ 10,000 ರೂಪಾಯಿ! ಆ ಹಣವನ್ನು ಈಗ, ಆ ‘ಉಪ’ ಅಧಿಕಾರಿಯ ಪರವಾಗಿ, ನೇರವಾಗಿ ಈ ಅಧಿಕಾರಿಯ ದತ್ತುಪುತ್ರರ ತರ ಇರುವ ಕೆಲ ಪಿಡಿಓಗಳು ಫೋನ್ ಮಾಡಿ ವಸೂಲಿ ಮಾಡುತ್ತಿದ್ದಾರೆ! “ಯಾವ ಮಗನೂ ಕಾಸು ಕೊಡದೆ ಓಡಿ ಹೋಗುವಂತಿಲ್ಲ. ನಿಮ್ಮ ಫೈಲ್ ಕ್ಲೀನ್ ಆಗಿದೆ ಎಂದರೆ, ಮೊದಲು ಹತ್ತು ಸಾವಿರ ತಂದು ಮುಟ್ಟಿಸಿ!” ಎಂಬ ಖಡಕ್ ‘ದಾದಾಗಿರಿ’ ಕಾಲ್ಗಳು ಹೋಗುತ್ತಿವೆ!
ಸಿಸ್ಟಮ್ ಗಂಟು ಇದು ಸರ್ಕಾರವೋ? ಇಲ್ಲ ‘ಖದೀಮರ ಜೂಜಾಟವೋ’?
ಆಡಳಿತದ ಅಂತಿಮ ಹಂತದಲ್ಲಿ ಕುಳಿತಿರುವ ಅಧಿಕಾರಿಯೊಬ್ಬರು ತನಿಖಾ ಸಂಸ್ಥೆಯ ಭಯವನ್ನೇ ಬಳಸಿಕೊಂಡು ಇಷ್ಟು ‘ಚೀಪ್ ಗೇಮ್’ ಆಡುತ್ತಿರುವುದನ್ನು ನೋಡಿದರೆ, ನಮಗೇನು ಅನಿಸುತ್ತದೆ ಗೊತ್ತೆ? ಇದು ಸರ್ಕಾರವಲ್ಲ. ಇದು, ಒಂದು ವ್ಯವಸ್ಥಿತ ಜೂಜಾಟದ ಅಡ್ಡ!
ಲೋಕಾಯುಕ್ತರ ಉದ್ದೇಶ ಪ್ರಾಮಾಣಿಕತೆಯನ್ನು ಸ್ಥಾಪಿಸುವುದು. ಆದರೆ, ಈ ‘ಉಪ’ ಅಧಿಕಾರಿ ಲೋಕಾಯುಕ್ತರನ್ನೇ ತಮ್ಮ ವಸೂಲಿ ದಂಧೆಗೆ ‘ಟೂಲ್’ ಆಗಿ ಬಳಸಿಕೊಂಡಿದ್ದಾನೆ! ತನ್ನ ಕೆಳಗಿರುವವರ ಭಯವನ್ನು ದುರುಪಯೋಗಪಡಿಸಿಕೊಳ್ಳುವ ಈ ಮನಸ್ಥಿತಿ, ನಿಜಕ್ಕೂ ‘ಸೈಕೋ ಪಾತ್’ಗಳಿಗೆ ಇರುವಂತದ್ದು.
ಪ್ರಾಮಾಣಿಕ ಅಧಿಕಾರಿಗಳು ಈ ನಡೆಯನ್ನು ‘ಕಾನೂನಿನ ವಿರುದ್ಧ ದೌರ್ಜನ್ಯ’ ಎಂದು ಟೀಕಿಸಿದ್ದಾರೆ. ಕೆಲವು ಪಿಡಿಓಗಳು ಈಗ ದಂಗೆ ಎದ್ದಿದ್ದಾರೆ! “ನಾವು ಹತ್ತು ಸಾವಿರ ಕೊಟ್ಟರೆ, ನಮ್ಮ ಗ್ರಾಮದ ಭ್ರಷ್ಟಾಚಾರಕ್ಕೆ ಇವರೇ ಪರೋಕ್ಷವಾಗಿ ಅನುಮತಿ ಕೊಟ್ಟಂತೆ ಆಗುವುದಿಲ್ಲವೇ?” ಎಂದು ಅವರು ತಮ್ಮ ಅಳಲನ್ನು ಸಾರ್ವಜನಿಕವಾಗಿ ಮತ್ತು ಗುಟ್ಟಾಗಿ ಹೇಳಿಕೊಳ್ಳುತ್ತಿದ್ದಾರೆ. ಅವರ ಪಾಲಿಗೆ, ಈ ‘ದೊಡ್ಡ ಬಾಬು’ ಈಗ ಸರಕಾರಿ ಸೇವಕನಲ್ಲ, ಬರೀ ‘ಖದೀಮರ ದಾದಾ’ ಆಗಿ ಕಾಣುತ್ತಿದ್ದಾನೆ.
ಕೊಪ್ಪಳದ ಈ ಗೇಮ್ ಈಗ ತೀವ್ರ ಚರ್ಚೆಗೀಡಾಗಿದೆ. ಅಧಿಕಾರಿ ವಲಯದಲ್ಲಿ ‘ಯಾರವನು ಆ ಬಂಟ್ವಾಳ?’ ಎಂಬ ಗುಸುಗುಸು ಶುರುವಾದರೆ, ಜನಸಾಮಾನ್ಯರ ಕಣ್ಣಿನಲ್ಲಿ ‘ಇಂತಹ ಅಧಿಕಾರಿಗಳಿಗೆ ನಾವೆಷ್ಟು ವರ್ಷ ಕಾಸು ಸುರಿಯಬೇಕು?’ ಎಂಬ ಪ್ರಶ್ನೆ ರಕ್ತ ಕಣಗಳಂತೆ ಕುದಿಯುತ್ತಿದೆ. ಈಗ ಈ ಇಡೀ ಪ್ರಕರಣವು ಬಗೆಹರಿಯಬೇಕಾದದ್ದು ಪಿಡಿಓಗಳ ಜೇಬಿನಿಂದಲ್ಲ ಬದಲಿಗೆ, ಜಿಲ್ಲಾ ಪಂಚಾಯತ್ ಆಡಳಿತದ ನೈತಿಕ ತಳಹದಿಯಿಂದ. ‘ಉಪ’ ಹುದ್ದೆಯಲ್ಲಿ ಕುಳಿತು, ಕಾನೂನನ್ನು ಬ್ಲ್ಯಾಕ್ಮೇಲ್ ಮಾಡುವ ಈ ‘ಖದೀಮ’ರ ಸಿದ್ಧಾಂತವನ್ನು ಮೊದಲು ಕಿತ್ತೆಸೆಯಬೇಕು.
ಹತ್ತು ಸಾವಿರ ರೂ.ಗಾಗಿ ಕೆಳಹಂತದ ಅಧಿಕಾರಿಗಳನ್ನು ಬ್ಲ್ಯಾಕ್ಮೇಲ್ ಮಾಡುವ ಈ ‘ಉಪ’ ಕಥೆ, ನಮ್ಮ ಆಡಳಿತದ ಕೊನೆಯುಸಿರು! ಇಂತಹ ನಾಟಕದ ಸೂತ್ರಧಾರನ ಮುಖವಾಡ ಕಳಚುವವರೆಗೂ ಈ ಫೈಲ್ ಕ್ಲೋಸ್ ಆಗುವುದಿಲ್ಲ.
ಮುಂದುವರೆಯುತ್ತದೆ…..