ಹಿರೇಸಿಂದೋಗಿ ಪಂಚಾಯತಿಯಲ್ಲಿ ‘ಕರ’ ಸುಲಿಗೆಯ ರಕ್ತಚರಿತ್ರೆ!
ರಣಬೇಟೆ ವೆಬ್ ನ್ಯೂಸ್ ಕೊಪ್ಪಳ ಜು:23
ಕೊಪ್ಪಳದ ಆ ಧೂಳು ಹಿಡಿದ ರಸ್ತೆಗಳಲ್ಲಿ, ಬೆವರು ಹರಿಸಿ ಜೀವನ ನಡೆಸೋ ಬಡ ಪಟಾಲಂಗೆ ‘ಅಧಿಕಾರ’ ಅನ್ನೋದು ಯಾವತ್ತೂ ಒಂದು ರೀತಿಯ ಭಯ. ಆ ಭಯವನ್ನೇ ಬಂಡವಾಳ ಮಾಡಿಕೊಳ್ಳೋಕೆ ಅಂತಾನೇ ಪಂಚಾಯತಿ ಕುರ್ಚಿಗಳ ಮೇಲೆ ಕೆಲವರು ಕೂತಿರ್ತಾರೆ.
ಹಿರೇಸಿಂದೋಗಿ ಗ್ರಾಮ ಪಂಚಾಯತಿ ಅನ್ನೋ ಈ ಗ್ರಾಮದಲ್ಲಿ ನಡೀತಿರೋದು ಸಾಧಾರಣ ಕಥೆಯಲ್ಲ. ಅಲ್ಲಿ ಕುಳಿತಿರೋ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಪ್ರಕಾಶ್ ಸಜ್ಜನ್ ಮತ್ತು ಆ ಕರಾವಸೂಲಿಗಾರ ಮಂಜುನಾಥ ಶಹಪುರ್ ಸೇರಿಕೊಂಡು ಆಡ್ತಿರೋ ಆಟ ನೋಡಿದ್ರೆ, ಅಬ್ಬಾ ಕಾನೂನು ಅನ್ನೋದು ಇವರ ಮನೆ ಆಸ್ತಿ ತರ ಕಾಣ್ತಿದೆ!
ಏನಿದು ‘ಕೈ’ಚಳಕದ ಅಸಲಿ ಕಥೆ?
ಕಾನೂನು ಚೀರಾಡಿ ಚೀರಾಡಿ ಹೇಳ್ತಿದೆ ಕರ್ನಾಟಕ ಗ್ರಾಮ ಸ್ವರಾಜ್ ಮತ್ತು ಪಂಚಾಯತ್ ರಾಜ್ ನಿಯಮಗಳು 2025′ ರ ನಿಯಮ 18 ಮತ್ತು ಕೋಷ್ಟಕ-1 ರ ನಿಯಮ 9(2), 9(3) ಪ್ರಕಾರ, ನಾಗರಿಕರು ತನ್ನ ಆಸ್ತಿ ವರ್ಗಾವಣೆ ಮಾಡಿಸಿಕೊಡಪ್ಪಾ ಅಂತ ಬಂದ್ರೆ, ಆತನ ನೋಂದಾಯಿತ ದಾಖಲೆಯಲ್ಲಿರೋ ಮುದ್ರಾಂಕ ಶುಲ್ಕದ ಮೇಲಷ್ಟೇ ಶೇಕಡಾ 2% ರಷ್ಟು ಶುಲ್ಕ ತಗೋಬೇಕು.
ಆದರೆ ಈ ಮಹಾಶಯರು ಏನು ಮಾಡಿದ್ರು ಗೊತ್ತಾ?
ಖರೀದಿ ಪತ್ರದ ಇಡೀ ಮೊತ್ತಕ್ಕೆ 3% ರಷ್ಟು ಕರ ಎತ್ತೋಕೆ ಶುರು ಮಾಡಿದ್ರು! ಅಂದರೆ, ಕಷ್ಟಪಟ್ಟು ಆಸ್ತಿ ತಗೊಂಡೋನ ಜೇಬಿಗೆ ನೆರಳು ಬೆಳಕಿನ ಆಟದಲ್ಲೇ ಕನ್ನ ಹಾಕೋದು. ಬಡವಂಗೆ ಕಾನೂನು ಗೊತ್ತಿಲ್ಲ, ಕೇಳೋರಿಲ್ಲ ಅನ್ನೋ ಅಹಂಕಾರ.
ತಮ್ಮದೇ ಅಕ್ಷರಗಳಲ್ಲಿ ‘ತಪ್ಪು’ ಒಪ್ಪಿಕೊಂಡ ‘ಹಿಂಬರಹ’!
ಆದರೆ, ಪಾಪದ ಕೊಡ ತುಂಬಿದಾಗ ಬಣ್ಣ ಬಯಲಾಗಲೇಬೇಕಲ್ಲ? ಈ ಅಕ್ರಮದ ಗಬ್ಬು ವಾಸನೆ ಹೊಡೆದಾಗ ದೂರು ತಲುಪಿದ್ದು ತಾಲೂಕು ಪಂಚಾಯತಿ ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ ಅಲ್ಲಿಂದ ನೋಟೀಸ್ ಹಾರಿ ಬರ್ತಿದ್ದಂತೆ, ನಮ್ಮ ಪ್ರಕಾಶ್ ಸಜ್ಜನ್ ಮತ್ತು ಮಂಜುನಾಥ ಶಹಪುರ್ ಹಿಂಬರಹ ನೀಡಿದರು.
“ನಮ್ಮ ಕಾರ್ಯಾಲಯದಲ್ಲಿ ಹಿಂದಿನಿಂದಲೂ ಖರೀದ ಪತ್ರದಲ್ಲಿದ್ದ ಮೊತ್ತಕ್ಕೆ 3% ತೆಗೆದುಕೊಳ್ಳುತ್ತಾ ಬಂದಿದ್ದು… ಇನ್ನು ಮುಂದೆ ನಿಯಮದ ಪ್ರಕಾರ 2% ತೆಗೆದುಕೊಳ್ಳಲಾಗುತ್ತದೆ”
ಅಬ್ಬಾ! ಎಂಥಾ ಬಂಡಧೈರ್ಯ! “ನಾವು ಇಷ್ಟು ದಿನ ಕದ್ದು ತಿಂತಿದ್ವಿ, ಈಗ ಸಿಕ್ಕಿಬಿದ್ದಿದ್ದೀವಿ, ಇನ್ಮೇಲೆ ಸರಿಯಾಗಿ ಇರ್ತೀವಿ” ಅಂತ ಸ್ವಹಸ್ತದಿಂದ ಬರೆದುಕೊಟ್ಟಿದ್ದಾರೆ! ತಮ್ಮದೇ ಸಹಿಯೊಂದಿಗೆ ಅಕ್ರಮವನ್ನು ಒಪ್ಪಿಕೊಂಡ ಮೇಲೆಯೂ ಇವರು ಪಂಚಾಯತಿ ಕುರ್ಚಿಯಲ್ಲಿ ಕೂರಬೇಕಾ?
ಸಿಇಒ ಸಾಹೇಬ್ರೆ… ಇನ್ನೇಕೆ ತಡ? ಅಮಾನತು ಮಾಡಿ!
ಈಗ ಪ್ರಶ್ನೆ ಇರೋದು ಕೊಪ್ಪಳ ಜಿಲ್ಲಾ ಪಂಚಾಯತಿಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳು ಹಾಗೂ ತಾಲೂಕು ಪಂಚಾಯತಿ ಕಾರ್ಯನಿರ್ವಾಹಕ ಅಧಿಕಾರಿಗಳ ಮುಂದೆ.
ಕರ್ನಾಟಕ ಗ್ರಾಮ ಸ್ವರಾಜ್ ಮತ್ತು ಪಂಚಾಯತ್ ರಾಜ್ ಕಾಯ್ದೆ 1993 ರ ಅಡಿಯಲ್ಲಿ ಪಂಚಾಯತಿಗಳ ಆಡಳಿತವನ್ನು ಸರಿದಾರಿಗೆ ತರುವುದು ನಿಮ್ಮ ಕರ್ತವ್ಯ. ನಿಯಮ 9(2), 9(3) ಹಾಗೂ ನಿಯಮ 18 ನ್ನು ಹೆಜ್ಜೆ ಹೆಜ್ಜೆಗೂ ತುಳಿದು, ಸಾರ್ವಜನಿಕರನ್ನು ಸುಲಿಗೆ ಮಾಡಿದ ಈ ಇಬ್ಬರನ್ನೂ ತಕ್ಷಣವೇ ಸೇವೆಯಿಂದ ಅಮಾನತು ಮಾಡಲೇಬೇಕು.
ಅಮಾನತುಗೊಳಿಸಿ, ಇವರ ಮೇಲೆ ಸೂಕ್ತ ಇಲಾಖಾ ತನಿಖೆ ನಡೆಸಿ ಶಿಸ್ತು ಕ್ರಮ ಜರುಗಿಸಬೇಕು.
ಇಷ್ಟು ದಿನ ಬಡ ಜನರಿಂದ ನಿಯಮಬಾಹಿರವಾಗಿ ಕಿತ್ತುಕೊಂಡ ಹೆಚ್ಚುವರಿ ಹಣವನ್ನು ವಾಪಸ್ ಆ ಆಸ್ತಿ ಮಾಲೀಕರ ಜೇಬಿಗೆ ತಲುಪಿಸುವಂತೆ ಆದೇಶ ಹೊರಡಿಸಬೇಕು.
ಸಾಕ್ಷಿ ನಿಮ್ಮ ಕಣ್ಣೆದುರೇ ಇದೆ. ತಪ್ಪಿತಸ್ಥ ಅಧಿಕಾರಿಗಳನ್ನು ಅಮಾನತು ಮಾಡಿ ಮನೆಗೆ ಕಳುಹಿಸ್ತೀರಾ ಅಥವಾ ‘ಸಹೋದ್ಯೋಗಿ ಪ್ರೇಮ’ ತೋರಿ ಸುಮ್ಮನೆ ಕೂರ್ತೀರಾ? ಜನ ಎಲ್ಲವನ್ನೂ ನೋಡ್ತಿದ್ದಾರೆ!
ಮುಂದುವರೆಯುತ್ತದೆ….