ಬ್ರಾಂಡ್ ಹೆಸರಿನಲ್ಲಿ ಅನುಮಾನಾಸ್ಪದ ಉತ್ಪನ್ನಗಳ ಮಾರಾಟ; ಗ್ರಾಹಕರೇ ಎಚ್ಚರ!
ರಣಬೇಟೆ ವೆಬ್ ನ್ಯೂಸ್ ಕೊಪ್ಪಳ ನಂ: 11
ಕೊಪ್ಪಳ ನಗರದ ಪ್ರಮುಖ ರಿಟೇಲ್ ಮಳಿಗೆಯಾದ ‘ಕೊಪ್ಪಳ ಮಾರ್ಟ್’ ತನ್ನದೇ ಆದ ಲೇಬಲ್ ಹೊಂದಿರುವ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಿದ್ದು, ಇದು ಬೌದ್ಧಿಕ ಆಸ್ತಿ ಹಕ್ಕುಗಳ ನಿಯಮಗಳನ್ನು ಉಲ್ಲಂಘಿಸುವ ಮತ್ತು ಗ್ರಾಹಕರನ್ನು ಗೊಂದಲಗೊಳಿಸುವ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಈ ಸಂಸ್ಥೆಯು ಟ್ರೇಡ್ ಮಾರ್ಕ್ ನೋಂದಣಿ ಪಡೆದಿಲ್ಲ ಎಂದು ಅಧಿಕೃತ ದಾಖಲೆಗಳು ಸೂಚಿಸುತ್ತಿವೆ. ಇದು ವ್ಯಾಪಾರದಲ್ಲಿ ‘ಕಾನೂನುಬಾಹಿರ ಕಳ್ಳಬಳಕೆ’ ಶಂಕೆಗಳನ್ನು ಬಲಪಡಿಸಿದೆ.
ಟ್ರೇಡ್ ಮಾರ್ಕ್ ರಕ್ಷಣೆ ಇಲ್ಲ, ಬ್ರ್ಯಾಂಡಿಂಗ್ ಮಾತ್ರ:
ಭಾರತೀಯ ಟ್ರೇಡ್ ಮಾರ್ಕ್ ಕಾಯಿದೆ, 1999 ರ ಪ್ರಕಾರ, ಒಂದು ವ್ಯಾಪಾರ ಸಂಸ್ಥೆಯು ತಮ್ಮ ಉತ್ಪನ್ನ ಅಥವಾ ಸೇವೆಯ ವಿಶಿಷ್ಟ ಗುರುತನ್ನು ರಕ್ಷಿಸಲು ಟ್ರೇಡ್ ಮಾರ್ಕ್ ಪ್ರಮಾಣಪತ್ರ ಪಡೆಯುವುದು ಅವಶ್ಯಕ. ‘ಕೊಪ್ಪಳ ಮಾರ್ಟ್’ ಮಳಿಗೆಯು ತನ್ನ ನಾಮಫಲಕದಲ್ಲಿ ಅಥವಾ ಉತ್ಪನ್ನಗಳ ಮೇಲೆ ‘®’ ಚಿಹ್ನೆಯನ್ನು ಬಳಸಿರುವುದಿಲ್ಲ.
ಟ್ರೇಡ್ ಮಾರ್ಕ್ ರಿಜಿಸ್ಟ್ರಿ ಡೇಟಾದಲ್ಲಿ ಪರಿಶೀಲಿಸಿದಾಗ, ‘ಕೊಪ್ಪಳ ಮಾರ್ಟ್’ ಎಂಬ ಹೆಸರಿನಲ್ಲಿ ಯಾವುದೇ ಮಾನ್ಯವಾದ ನೋಂದಾಯಿತ ಪ್ರಮಾಣಪತ್ರ ಲಭ್ಯವಾಗಿಲ್ಲ. ಇದರರ್ಥ, ಈ ಸಂಸ್ಥೆಯು ತನ್ನ ಬ್ರ್ಯಾಂಡ್ ಹೆಸರಿಗೆ ಯಾವುದೇ ಕಾನೂನುಬದ್ಧ ಹಕ್ಕು ಅಥವಾ ಕಾನೂನು ರಕ್ಷಣೆಯನ್ನು ಹೊಂದಿಲ್ಲ ಎಂಬುದು ಸಾವಜನಿಕ ವಲಯದಲ್ಲಿ ತೀವ್ರ ಚಚೆಗೆ ಗ್ರಾಸವಾಗಿದೆ.
ಬ್ರ್ಯಾಂಡ್ ಹೆಸರಿನಲ್ಲಿ ಸ್ವಂತ ಉತ್ಪನ್ನಗಳ ಮಾರಾಟ
ಮಾಲ್ನ ನಾಮಫಲಕದಲ್ಲಿ ‘ಕೊಪ್ಪಳ ಮಾರ್ಟ್’ ಲೋಗೋ ಮತ್ತು ‘ಕೊಪ್ಪಳ ಮಾರ್ಟ್’ ಎಂದು ಸ್ಪಷ್ಟವಾಗಿ ಮುದ್ರಿಸಿರುವ ಪ್ಯಾಕೇಜ್ಗಳಲ್ಲಿ , ಕಸೂರಿ ಮೇಥಿ ಮತ್ತು ಧನಿಯಾ ಸಂಸ್ಥೆಯು ದಿನಸಿ ವಸ್ತುಗಳನ್ನು ಮಾರಾಟ ಮಾಡುತ್ತಿದೆ.
ಟ್ರೇಡ್ ಮಾರ್ಕ್ ಪರವಾನಿಗೆ ಇಲ್ಲದಿದ್ದಾಗ, ಈ ಸಂಸ್ಥೆಯು ತನ್ನದೇ ಆದ ಹೆಸರು ಮತ್ತು ಲೋಗೋವನ್ನು ಬಳಸಿ ಸಾರ್ವಜನಿಕ ಬಳಕೆಯ ವಸ್ತುಗಳನ್ನು ಪ್ಯಾಕ್ ಮಾಡಿ ಮಾರಾಟ ಮಾಡುವುದು ಗ್ರಾಹಕರಿಗೆ ಮೋಸ ಮಾಡುವ ಪ್ರಯತ್ನವಾಗಿ ಕಂಡುಬರುತ್ತಿದೆ.
‘ಕಳ್ಳಬಳಕೆ’ಯ ಗಂಭೀರ ಶಂಕೆ
ಕಾನೂನು ವಲಯದ ಪ್ರಕಾರ, ನೋಂದಣಿ ಇಲ್ಲದಿದ್ದರೂ, ಒಂದು ಸಂಸ್ಥೆಯು ಇನ್ನೊಂದು ಸಂಸ್ಥೆಯ ಹೆಸರು ಅಥವಾ ಖ್ಯಾತಿಯನ್ನು ಬಳಸಿಕೊಂಡು ಗ್ರಾಹಕರಲ್ಲಿ ಗೊಂದಲ ಸೃಷ್ಟಿಸಿದರೆ, ಅದನ್ನು ಕಳ್ಳಬಳಕೆ ಎಂದು ಪರಿಗಣಿಸಲಾಗುತ್ತದೆ.
ಸ್ಥಳೀಯ ಮಟ್ಟದಲ್ಲಿ, ‘ಕೊಪ್ಪಳ ಮಾರ್ಟ್’ ತನ್ನ ಹೆಸರು ಮತ್ತು ಬ್ರ್ಯಾಂಡಿಂಗ್ ಮೂಲಕ ವಿಶಿಷ್ಟ ಸಂಸ್ಥೆಯಂತೆ ಬಿಂಬಿಸಿಕೊಂಡು ವ್ಯಾಪಾರ ಮಾಡುತ್ತಿದೆ.
ಯಾವುದೇ ಮೂರನೇ ವ್ಯಕ್ತಿ ಈ ಹೆಸರನ್ನು ಅಥವಾ ಲೋಗೋವನ್ನು ಕಾನೂನುಬದ್ಧವಾಗಿ ನೋಂದಾಯಿಸಿದರೆ, ‘ಕೊಪ್ಪಳ ಮಾರ್ಟ್’ ಸಂಸ್ಥೆಯು ತನ್ನ ಉತ್ಪನ್ನಗಳನ್ನು ಮಾರುಕಟ್ಟೆಯಿಂದ ತಕ್ಷಣವೇ ಹಿಂತೆಗೆದುಕೊಳ್ಳಬೇಕಾಗುತ್ತದೆ.
ಯಾವುದೇ ರಾಷ್ಟ್ರೀಯ ಬ್ರ್ಯಾಂಡ್ಗೆ ಈ ಹೆಸರು ಸಾಮ್ಯತೆ ಹೊಂದಿದ್ದರೆ, ಅದು ಆ ಬ್ರ್ಯಾಂಡ್ಗೆ ಹಾನಿಯುಂಟು ಮಾಡುವ ಟ್ರೇಡ್ ಮಾರ್ಕ್ ಉಲ್ಲಂಘನೆಯ ವ್ಯಾಪ್ತಿಗೂ ಬರಬಹುದು. ಈ ಪ್ರಕರಣವು ಸ್ಪಷ್ಟವಾಗಿ ಗ್ರಾಹಕ ಸಂರಕ್ಷಣಾ ಕಾಯಿದೆ, 2019 ರ ಅಡಿಯಲ್ಲಿ ‘ಅನ್ಯಾಯದ ವ್ಯಾಪಾರ ಪದ್ಧತಿ’ ಯ ವ್ಯಾಪ್ತಿಗೆ ಬರುವ ಸಾಧ್ಯತೆ ಇದೆ.
ಈ ಹಿನ್ನೆಲೆಯಲ್ಲಿ, ಕೊಪ್ಪಳ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗ ಮತ್ತು ಜಿಲ್ಲಾಡಳಿತ ಈ ವಿಷಯದಲ್ಲಿ ತಕ್ಷಣ ಹಸ್ತಕ್ಷೇಪ ಮಾಡಬೇಕು. ಟ್ರೇಡ್ ಮಾರ್ಕ್ ಪರವಾನಿಗೆ ಇಲ್ಲದ ಸಂಸ್ಥೆಗಳು ತಮ್ಮದೇ ಬ್ರ್ಯಾಂಡ್ನ ಲೇಬಲ್ಗಳಲ್ಲಿ ಉತ್ಪನ್ನಗಳನ್ನು ಮಾರಾಟ ಮಾಡುವುದು ವ್ಯಾಪಾರದಲ್ಲಿ ಪಾರದರ್ಶಕತೆ ಮತ್ತು ಗ್ರಾಹಕರ ವಿಶ್ವಾಸಕ್ಕೆ ಧಕ್ಕೆ ತರುತ್ತದೆ.
ಈ ‘ಕೊಪ್ಪಳ ಮಾರ್ಟ್ ‘ ಮಳಿಗೆಯು ಪರವಾನಿಗೆ ಇಲ್ಲದ ಬ್ರ್ಯಾಂಡಿಂಗ್ ಮೂಲಕ ಸಾರ್ವಜನಿಕರಿಗೆ ವಿಕ್ರಯ ನಡೆಸುತ್ತಿದ್ದರೂ, ಜಿಲ್ಲೆಯ ನಿಯಂತ್ರಕ ಪ್ರಾಧಿಕಾರಗಳು ಈ ಕುರಿತು ಅಸಡ್ಡೆ ತೋರಿಸುತ್ತಿರುವುದು ಆಶ್ಚರ್ಯಕರ ವಿಷಯ.
ನಗರಸಭೆಯ ಕರ್ತವ್ಯದಲ್ಲಿ ಲೋಪ: ಯಾವುದೇ ವಾಣಿಜ್ಯ ಸಂಸ್ಥೆಗೆ ವ್ಯಾಪಾರ ಪರವಾನಗಿಯನ್ನು ಮಂಜೂರು ಮಾಡುವ ಪ್ರಧಾನ ಜವಾಬ್ದಾರಿ ನಗರಸಭೆಯ ವ್ಯಾಪ್ತಿಗೆ ಬರುತ್ತದೆ. ಒಂದು ಸಂಸ್ಥೆಯು ಬೌದ್ಧಿಕ ಸ್ವತ್ತು ಅಧಿಕಾರಗಳನ್ನು ಅನುಸರಿಸುತ್ತಿದೆಯೇ ಅಥವಾ ಇಲ್ಲವೇ ಎಂಬುದನ್ನು ಪರಿಶೀಲಿಸುವಲ್ಲಿ ನಗರಸಭೆಯ ಅಧಿಕಾರಿಗಳು ಪರಿಶೀಲನಾ ಪ್ರಕ್ರಿಯೆಯಲ್ಲಿ ಹಿಂದೇಟು ಹಾಕಿರುತ್ತಾರೆ. ಈ ಕಾರಣದಿಂದಲೇ, ಟ್ರೇಡ್ ಮಾರ್ಕ್ ನೋಂದಣಿ ಇಲ್ಲದಿದ್ದರೂ ಮಳಿಗೆಯು ಸುಲಭವಾಗಿ ವಾಣಿಜ್ಯ ಚಟುವಟಿಕೆಗಳನ್ನು ನಡೆಸಲು ಅನುಮತಿ ಪಡೆದಿದೆ ಎಂಬ ಆರೋಪವಿದೆ.
ಆಹಾರ ಗುಣಮಟ್ಟ ಸುರಕ್ಷತಾ ಇಲಾಖೆಯ ಉದಾಸೀನತೆ: ಈ ಮಳಿಗೆಯು ತನ್ನದೇ ಮುದ್ರಾಂಕಿತ ಲೇಬಲ್ಗಳ ಅಡಿಯಲ್ಲಿ ಆಹಾರ ಪದಾರ್ಥಗಳನ್ನು ಸಿದ್ಧಪಡಿಸಿ ಅಥವಾ ಪುನರ್-ಪ್ಯಾಕ್ ಮಾಡಿ ಮಾರಾಟ ಮಾಡುತ್ತಿದೆ. ಆಹಾರ ಗುಣಮಟ್ಟ ಮತ್ತು ಸುರಕ್ಷತಾ ಪ್ರಾಧಿಕಾರದ ಇಲಾಖೆಯು, ಇಂತಹ ಸ್ಥಳೀಯ ಬ್ರ್ಯಾಂಡ್ಗಳಿಗೆ ಪರವಾನಿಗೆ ನೀಡುವಾಗ, ಆಯಾ ಸಂಸ್ಥೆಗಳು ತಮ್ಮ ಬ್ರ್ಯಾಂಡ್ನ ಕಾನೂನುಬದ್ಧ ಸ್ವಾಮ್ಯತ್ವ ವನ್ನು ಹೊಂದಿವೆಯೇ ಮತ್ತು ಗ್ರಾಹಕರಿಗೆ ಮೋಸವಾಗದಂತೆ ಸೂಕ್ತ ಲೇಬಲಿಂಗ್ ನಿಯಮಗಳನ್ನು ಅನುಸರಿಸಿವೆಯೇ ಎಂಬುದನ್ನು ಕಡ್ಡಾಯವಾಗಿ ಪರಿಶೀಲಿಸಬೇಕು. ಆದರೆ, ಈ ಇಲಾಖೆಯ ಅಧಿಕಾರಿಗಳು ಟ್ರೇಡ್ ಮಾರ್ಕ್ ಪ್ರಮಾಣಪತ್ರದ ಪರಿಶೀಲನೆಗೆ ನಿರ್ಲಕ್ಷ್ಯ ತೋರಿರುತ್ತಾರೆ.
ಆಂತರಿಕ ಸಮನ್ವಯದ ಕೊರತೆ : ವಾಣಿಜ್ಯ ಮುದ್ರೆಗಳ (ಟ್ರೇಡ್ ಮಾರ್ಕ್) ನಿರ್ವಹಣೆಯು ಕೇಂದ್ರ ಸರ್ಕಾರದ ವ್ಯಾಪ್ತಿಗೆ ಒಳಪಟ್ಟರೂ, ಸ್ಥಳೀಯ ಮಟ್ಟದಲ್ಲಿ ವಿಕ್ರಯ ಪರವಾನಿಗೆ ನೀಡುವಾಗ ಈ ನಿಯಮಗಳ ಬಗ್ಗೆ ಅಂತರ-ಇಲಾಖಾ ಸಮನ್ವಯದ ಕೊರತೆ ಯಿಂದಾಗಿ ಇಂತಹ ವಂಚನೆಗಳು ಸುಲಭವಾಗಿ ನಡೆಯುತ್ತಿವೆ. ಈ ಇಲಾಖೆಗಳ ನಿರ್ಲಕ್ಷ್ಯವೇ ಟ್ರೇಡ್ ಮಾರ್ಕ್ ರಕ್ಷಣೆ ಇಲ್ಲದ ವಾಣಿಜ್ಯಕ್ಕೆ ಪ್ರತ್ಯಕ್ಷವಾಗಿ ಪ್ರೋತ್ಸಾಹ ನೀಡಿದಂತಾಗಿದೆ
ರಣಬೇಟೆ ವೆಬ್ ನ್ಯೂಸ್ ಒದಗಿಸಿದ ಸ್ಪಷ್ಟ ಸಾಕ್ಷ್ಯಾಧಾರಗಳ (ಕೊಪ್ಪಳ ಮಾರ್ಟ್ನ ನಾಮಫಲಕ ಮತ್ತು ಲೇಬಲ್ಗಳು) ಆಧಾರದ ಮೇಲೆ, ಕೊಪ್ಪಳ ಜಿಲ್ಲಾಡಳಿತವು ಟ್ರೇಡ್ ಮಾರ್ಕ್ ಕಾಯಿದೆಯ ಅಡಿಯಲ್ಲಿ ಮತ್ತು ಗ್ರಾಹಕರ ಹಿತಾಸಕ್ತಿಯ ರಕ್ಷಣೆಗಾಗಿ ತಕ್ಷಣವೇ ಸುಮೊಟೊ ಕೇಸ್ ದಾಖಲಿಸಿ ಸಮಗ್ರ ತನಿಖೆ ನಡೆಸಬೇಕು.” ರಣಬೇಟೆ ವೆಬ್ ನ್ಯೂಸ್ ವರದಿಯ ಮೂಲಕ ಜಿಲ್ಲಾಡಳಿತವು ತಕ್ಷಣವೇ ಈ ಮಾಲ್ಗಳ ವ್ಯಾಪಾರ ಪರವಾನಗಿ ಮತ್ತು ಟ್ರೇಡ್ ಮಾರ್ಕ್ ಅನುಸರಣೆ ಕುರಿತು ಸಮಗ್ರ ಪರಿಶೀಲನೆ ನಡೆಸಬೇಕು ಎಂದು ಒತ್ತಾಯಿಸುತ್ತದೆ.
ಮುಂದುವರೆಯುತ್ತದೆ…