ಇಲಾಖೆಯ ಕಣ್ಣೆದುರೇ ಉಪ ಪ್ರಾಚಾರ್ಯರ ಏಕಚಕ್ರಾಧಿಪತ್ಯದ ‘ಸ್ಕ್ಯಾನಿಂಗ್’ ದಂಧೆ?
ರಣಬೇಟೆ ವೆಬ್ ನ್ಯೂಸ್ ಜೂನ್:11
ಕೊಪ್ಪಳ : ಇದು ಅಕ್ಷರ ಕಲಿಸುವ ದೇಗುಲವೋ ಅಥವಾ ಬಡ ಪಾಲಕರ ಜೇಬಿಗೆ ಕತ್ತರಿ ಹಾಕುವ ಕಾರ್ಪೊರೇಟ್ ಕಚೇರಿಯೋ? ಇಂಥದ್ದೊಂದು ಅನುಮಾನ ಈಗ ಕೊಪ್ಪಳದ ಸಾರ್ವಜನಿಕ ವಲಯದಲ್ಲಿ ತೀವ್ರವಾಗಿ ಚರ್ಚೆಯಾಗುತ್ತಿದೆ. ಹೌದು, ಕೊಪ್ಪಳದ ಸರ್ಕಾರಿ ಬಾಲಕಿಯರ ಪದವಿ ಪೂರ್ವ ಕಾಲೇಜಿನ ಪ್ರೌಢಶಾಲಾ ವಿಭಾಗದಲ್ಲಿ ಪಾಲಕರನ್ನು ಮತ್ತು ಇಲಾಖೆಯ ನಿಯಮಗಳನ್ನು ಅಕ್ಷರಶಃ ದಿಕ್ಕುತಪ್ಪಿಸುವ ವಿಚಿತ್ರ ವ್ಯವಸ್ಥೆಯೊಂದು ಜಾರಿಗೆ ಬಂದಿದೆ.
ಯಾರ ಅನುಮತಿಯೂ ಇಲ್ಲದೆ, ಇಡೀ ಜಿಲ್ಲೆಯಲ್ಲೇ ಇಲ್ಲದ ‘ಕ್ಯೂಆರ್ ಕೋಡ್’ ಮತ್ತು ‘ಸ್ಕ್ಯಾನಿಂಗ್’ ಸಿಸ್ಟಮ್ ಒಂದನ್ನು ತಂದು, ಬಡ ಹೆಣ್ಣುಮಕ್ಕಳ ಪಾಲಕರಿಂದ ನೂರಾರು ರೂಪಾಯಿ ಸುಲಿಗೆ ಮಾಡುತ್ತಿರುವ ಗಂಭೀರ ಆರೋಪವೊಂದು ಈಗ ಬಯಲಿಗೆ ಬಂದಿದೆ.
ನಡೆದಿದ್ದೇನು? ಇಲ್ಲಿದೆ ನೋಡಿ ಆ ‘ಸ್ಕ್ಯಾನ್’ ರಹಸ್ಯ!
ಪ್ರಸ್ತುತ 2026-27ನೇ ಶೈಕ್ಷಣಿಕ ಸಾಲಿನ 8, 9 ಮತ್ತು 10ನೇ ತರಗತಿಯ ವಿದ್ಯಾರ್ಥಿನಿಯರ ದಾಖಲಾತಿ ಪ್ರಕ್ರಿಯೆ ಆರಂಭವಾಗಿದೆ. ನಿಯಮದ ಪ್ರಕಾರ ಸರ್ಕಾರಿ ಶಾಲೆಯಲ್ಲಿ ದಾಖಲಾತಿ ಪ್ರಕ್ರಿಯೆ ಅತ್ಯಂತ ಸರಳವಾಗಿ, ಪಾರದರ್ಶಕವಾಗಿ ನಡೆಯಬೇಕು. ಆದರೆ, ಈ ಶಾಲೆಯ ಉಪ ಪ್ರಾಚಾರ್ಯರಾದ ಶ್ರೀ ವೀರಯ್ಯ ಸುಡಿಮಠ ಅವರು ಮಾಡಿದ್ದೇ ಬೇರೆ. ಅವರು ಶಾಲೆಯ ಗೋಡೆಗೆ ಒಂದು ನೋಟಿಸ್ ಅಂಟಿಸಿದ್ದಾರೆ. ಅದರಲ್ಲಿ ಒಂದು ‘ಕ್ಯೂಆರ್ ಕೋಡ್’ (QR Code) ಇದೆ! ಅದರ ಕೆಳಗೆ ‘ಪಾಲಕರಿಗೆ ಸೂಚನೆಗಳು’ ಎಂದು ಬರೆದು, ಎಸ್ಡಿಎಂಸಿ (SDMC) ಅಧ್ಯಕ್ಷರಾದ ಶ್ರೀ ಸಂಜಯ್ ದಾಸ್ ಮತ್ತು ತಮ್ಮ ಸಹಿ-ಸೀಲು ಹಾಕಿ ಪ್ರಕಟಿಸಿದ್ದಾರೆ.
ವಿಷಯ ಏನೆಂದರೆ, ಪಾಲಕರು ಶಾಲೆಗೆ ಬಂದರೆ ಅಲ್ಲಿ ನೇರವಾಗಿ ಅರ್ಜಿ ಸಿಗುತ್ತಿಲ್ಲ! ಬದಲಿಗೆ, ಗೋಡೆಯ ಮೇಲಿರುವ ಆ ಕ್ಯೂಆರ್ ಕೋಡ್ ಅನ್ನು ಮೊಬೈಲ್ನಲ್ಲಿ ಸ್ಕ್ಯಾನ್ ಮಾಡಿಕೊಂಡು, ಫೋಟೋ ತೆಗೆದುಕೊಂಡು ಶಾಲೆಯ ಹೊರಗಿನ ಅಂಗಡಿಗಳಿಗೆ ಅಲೆಯಬೇಕು.
ಖಾಸಗಿ ಜೆರಾಕ್ಸ್ ಅಂಗಡಿಯೊಂದಿಗೆ ಒಳ ಒಪ್ಪಂದ?
ಹೀಗೆ ಸ್ಕ್ಯಾನ್ ಮಾಡಿದ ಫೋಟೋ ಹಿಡಿದುಕೊಂಡು ಪಾಲಕರು ಮಹಿಳಾ ಪ್ರಥಮ ದರ್ಜೆ ಕಾಲೇಜಿನ ಎದುರುಗಡೆ ಇರುವ ‘ಶ್ರೀ ಹನುಮಾನ್ ಎಂಟರ್ಪ್ರೈಸಸ್’ ಜೆರಾಕ್ಸ್ ಅಂಗಡಿಗೆ ಹೋಗಬೇಕು. ಅಲ್ಲಿ ಆನ್ಲೈನ್ ಫಾರ್ಮ್, ಅರ್ಜಿ ಮತ್ತು ಜೆರಾಕ್ಸ್ ನೆಪದಲ್ಲಿ ಪಾಲಕರಿಂದ ಬರೋಬ್ಬರಿ 300 ರೂಪಾಯಿಗಳನ್ನು ವಸೂಲಿ ಮಾಡಲಾಗುತ್ತಿದೆ! ಅಷ್ಟಕ್ಕೇ ಮುಗಿಯುವುದಿಲ್ಲ; ಆ ಅರ್ಜಿಯನ್ನು ತಂದು ಮತ್ತೆ ಶಾಲೆಗೆ ನೂರು ರೂಪಾಯಿ ಸಂದಾಯ ಮಾಡಿ ಸಬ್ಮಿಟ್ ಮಾಡಬೇಕು. ಅಂದರೆ, ಒಂದು ಸರ್ಕಾರಿ ಶಾಲೆಯ ಪ್ರವೇಶಾತಿಗಾಗಿ ಬಡ ಪಾಲಕರು ಕನಿಷ್ಠ 400 ರೂಪಾಯಿ ಕಳೆದುಕೊಳ್ಳಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ. ಕಳೆದ ವರ್ಷ ಕೇವಲ 98 ರೂಪಾಯಿ ಇದ್ದ ಪ್ರವೇಶಾತಿ ವೆಚ್ಚ, ಈ ವರ್ಷ ದಿಢೀರ್ ಆಗಿ ಈ ಸ್ಕ್ಯಾನಿಂಗ್ ಸಿಸ್ಟಮ್ನಿಂದಾಗಿ ನೂರಾರು ರೂಪಾಯಿಗಳಿಗೆ ಏರಿದ್ದು ಹೇಗೆ?
ಇಲಾಖೆಯ ಪರವಾನಗಿ ಇದೆಯೇ? ಸಿಬ್ಬಂದಿ ಕಡೆಗಣನೆ ಯಾಕೆ?
ಸರಕಾರದ ಆದೇಶ ಎಲ್ಲಿದೆ? ಈ ಹೊಸ ಸ್ಕ್ಯಾನಿಂಗ್ ಮತ್ತು ಆನ್ಲೈನ್ ಅರ್ಜಿಯ ಸಿಸ್ಟಮ್ ತರಲು ಶಿಕ್ಷಣ ಇಲಾಖೆ ಏನಾದರೂ ಅಧಿಕೃತ ಪರವಾನಗಿ ನೀಡಿದೆಯೇ? ಇಲ್ಲದಿದ್ದರೆ, ಇಡೀ ರಾಜ್ಯದಲ್ಲಿ ಯಾವುದೇ ಸರ್ಕಾರಿ ಶಾಲೆಯಲ್ಲಿ ಇರದ ಇಂತಹ ವಿಚಿತ್ರ ಪದ್ಧತಿ ಈ ಕೊಪ್ಪಳದ ಶಾಲೆಯಲ್ಲಿ ಮಾತ್ರ ಯಾಕೆ ಜಾರಿಯಾಯಿತು? ಸಿಬ್ಬಂದಿ ಮತ್ತು ಎಸ್ಡಿಎಂಸಿ ಜಂಟಿ ಸಭೆ ನಡೆದಿದೆಯೇ? ಶಾಲೆಯ ಯಾವುದೇ ಹೊಸ ನಿಯಮ ಜಾರಿಗೆ ತರುವ ಮುನ್ನ ಸಿಬ್ಬಂದಿ ವರ್ಗ ಮತ್ತು ಶಾಲಾ ಅಭಿವೃದ್ಧಿ ಸಮಿತಿಯ (SDMC) ತುರ್ತು ಸಭೆ ನಡೆಸಿ ಒಪ್ಪಿಗೆ ಪಡೆಯಬೇಕು. ಆದರೆ, ಇಲ್ಲಿ ಶಾಲೆಯ ಇತರೆ ಸಿಬ್ಬಂದಿಗಳನ್ನು ಸಂಪೂರ್ಣವಾಗಿ ಕಡೆಗಣಿಸಿ, ಏಕಪಕ್ಷೀಯವಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.
ಹಳೆಯ ಪದ್ಧತಿ ಕೈಬಿಟ್ಟಿದ್ದರ ಮರ್ಮವೇನು? ಪ್ರತಿ ವರ್ಷ ಶಾಲೆಯ ಎಲ್ಲಾ ಶಿಕ್ಷಕರಿಗೆ ‘ಅಲ್ಫಾಬೆಟಿಕಲ್’ ಮಾದರಿಯಲ್ಲಿ ದಾಖಲಾತಿ ಜವಾಬ್ದಾರಿಯನ್ನು ಹಂಚಿಕೆ ಮಾಡಲಾಗುತ್ತಿತ್ತು. ಈ ವರ್ಷ ಆ ವ್ಯವಸ್ಥೆಯನ್ನು ದಿಢೀರ್ ಆಗಿ ಕೈಬಿಟ್ಟು, ಹೊರಗಿನ ಜೆರಾಕ್ಸ್ ಅಂಗಡಿಯ ಮುಖಾಂತರವೇ ಅರ್ಜಿ ಪ್ರಕ್ರಿಯೆ ನಡೆಯುವಂತೆ ಮಾಡಿರುವುದರ ಹಿಂದಿನ ಆರ್ಥಿಕ ಮರ್ಮವೇನು?
ಬಿಇಓ ಕಚೇರಿಯ ಪಕ್ಕದಲ್ಲೇ ಧೈರ್ಯ!
ಅತ್ಯಂತ ಆಶ್ಚರ್ಯದ ಸಂಗತಿಯೆಂದರೆ, ಈ ಶಾಲೆಯ ತೀರಾ ಪಕ್ಕದಲ್ಲೇ ಬಿಇಓ ಕಚೇರಿ ಇದೆ. ಅಧಿಕಾರಿಗಳು ಮೂಗಿನ ನೇರಕ್ಕೆ ಕುಳಿತಿದ್ದರೂ, ಕಾನೂನಿನ ಯಾವುದೇ ಅಂಜಿಕೆ-ಅಳುಕು ಇಲ್ಲದೆ, ಮುಖ್ಯೋಪಾಧ್ಯಾಯರ ಸ್ಥಾನದಲ್ಲಿ ಕುಳಿತು ಏಕಸಾರ್ವಭೌಮತ್ವದ ಅಧಿಕಾರ ಚಲಾಯಿಸುತ್ತಿರುವುದು ಹೇಗೆ ಸಾಧ್ಯ? ಇದು ಮೇಲಧಿಕಾರಿಗಳ ನಿಗಾ ಕೊರತೆಯೋ ಅಥವಾ ಮೌನ ಸಮ್ಮತಿಯೋ?
ಪಾಲಕರು ಮತ್ತು ರಣಬೇಟೆಯ ಆಗ್ರಹ
ಬಡ ಹೆಣ್ಣುಮಕ್ಕಳ ಶಿಕ್ಷಣದ ಹೆಸರಿನಲ್ಲಿ ನಡೆಯುತ್ತಿರುವ ಈ ಆನ್ಲೈನ್ ಕರ್ಮಕಾಂಡವನ್ನು ತಕ್ಷಣವೇ ಬಂದ್ ಮಾಡಬೇಕು. ಡಿಡಿಪಿಐ ಸೋಮಶೇಖರ ಅವರು ಈ ಕೂಡಲೇ ಮಧ್ಯಪ್ರವೇಶಿಸಿ ತನಿಖೆ ನಡೆಸಬೇಕು. ಈಗಾಗಲೇ ಕ್ಯೂಆರ್ ಕೋಡ್ ನೆಪದಲ್ಲಿ ಖಾಸಗಿ ಅಂಗಡಿಗಳಿಗೆ ಪಾಲಕರು ಪಾವತಿಸಿರುವ ಹಣವನ್ನು ಮರಳಿ ಕೊಡಿಸುವ ವ್ಯವಸ್ಥೆಯಾಗಬೇಕು. ನಿಯಮ ಬಾಹಿರವಾಗಿ ಅಧಿಕಾರ ಚಲಾಯಿಸುತ್ತಿರುವ ಉಪ ಪ್ರಾಚಾರ್ಯರಾದ ಸುಡಿಮಠ ಅವರ ಮೇಲೆ ಬಿಇಓ ಮತ್ತು ಡಿಡಿಪಿಐ ಅವರು ಮಾನ್ಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ ತಕ್ಷಣವೇ ಶಿಸ್ತುಕ್ರಮಕ್ಕಾಗಿ ಶಿಫಾರಸ್ಸು ಮಾಡಿ, ಇವರನ್ನು ಬೇರೆಡೆಗೆ ನಿಯೋಜಿಸಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.
ಸದ್ಯಕ್ಕಂತೂ ಈ ಇಡೀ ಜಾಲ ಮತ್ತು ದೂರು ಮಾನ್ಯ ಉಪ ನಿರ್ದೇಶಕರಾದ ಸೋಮಶೇಖರಗೌಡ ಅವರ ಗಮನಕ್ಕೆ ಇದೆ ಎನ್ನಲಾಗಿದೆ. ಸುದ್ದಿ ಸಾರ್ವಜನಿಕವಾಗಿ ಹೊರಬಂದ ಮೇಲಾದರೂ ಇಲಾಖೆಯ ಉನ್ನತ ಅಧಿಕಾರಿಗಳು ಬಡವರ ಪರವಾಗಿ ಶಿಸ್ತುಕ್ರಮ ಕೈಗೊಳ್ಳುತ್ತಾರೋ ಅಥವಾ ಎಂದಿನಂತೆ ‘ತನಿಖೆಯ ಭರವಸೆ’ ನೀಡಿ ಕೈತೊಳೆದುಕೊಳ್ಳುತ್ತಾರೋ?
ಕಾದು ನೋಡೋಣ…!